So saam met die son wat sak op 'n beautiful Sondagaand sit ek met 'n skemerkelkie en gee graag terugvoer oor die beste reunie waarop ek nog ooit was.
Die 20 jaar reunie het die Vrydag oggend met die luidste BAAANNNGG in the history of history afgeslaan om 10h00 en teen middernag was daar nog geen einde in sig nie. Van heinde en verre het 'n ander betekenis gekry. Deidre Botma het van PE af opgevlieg, Christo Swart van Durban en Flippie ("Massipa") Markram van Bazarutho, Mosambiek!!! En dit was net vir die Vrydagaand Vind Mekaar! Ons was seker so 40-50 mense daar maar ons het geklink soos 100. Die manne (16 spelers + 4 saamlopers) het die reunie amptelik begin met die eerste afslaan op Mooinooi se golfbaan. 9 putjies het hul toe besig gehou tot 5uur.... Jaco Cloete het soos 'n krap gestap en Paul Smit het met iemand onsigbaar reg langs my gepraat toe ek hulle na die golf sien. Ek het nie gedink hulle gaan regop wees vir lank nie, maar hul tweede (en derde) asems het hulle almal nog aan die gang gehou tot lank na middernag!
Ek's verder trots om te rapporteer dat Henning Lubbe nog net so lekker lang-arm dans as wat hy op skool met sy wit mokkasins gedans het, maar ons beide het soos hygende en blasende osse besef die liedjies is nou deesdae baie laaaannnger as wat dit op skool was. Ronel de Jager en Johan ("BP") du Toit het geen einde gehad nie en elke poging van 'n vroeg-wegloper taktvol en susesvol oorreed om net nog een doppie (BP) of net nog een dansie (Ronel) te he totdat jy vergeet het jy was eintlik op pad gewees. Liezel Opperman en Annelie Smit het hulself oortref met al die reelings tot in die kleinste detail en vir elke een wat opgedaag het uit die bloute, was daar reeds alles - stoele, eetgerei, en 'n berg kos wat gelyk het of ons die hele Rustenburg gaan voer. Riaan Eastes en sy vrou Retha het die varkvleis vir die naweek geborg. Ek dink hulle het met 'n trok opgedaag - en ons is almal oortuig die Eastes's se varkies kry koring en melk te ete want sulke lekker vark het nie een van ons al ge-eet nie.
Na ek Saterdagoggend met die grootste hangover wakker geword het wat ek in 20 jaar gehad het, 11h00 nog in my pajamas in die sonnetjie gesit en energie opgaar het soos 'n akkedis, was daar eenvoudig net nie 'n manier dat ek myself kon sleep om nog te gaan sports nie. Middagslapie het my reggekry en toe ek 3 uur daar opdaag was die driebeen-resies, waterballon gooi en alle sports verby. Daar was gepiekniek onder die koeltebome en boerewors-rolle vir almal gebraai. Ons klomp wat wou, gaan stap toe 'n draai deur die skoolgronde op 'n "onthou-jy-nog-tog". Ons het begin by Die Mik, verby Kraai en Camel se klasse, die snoepie is nou Deborah se kantoor (ja, sy's nou nog daar!) en die bib is nou 'n fensie kafeteria, rekenaarsentrum en bib all-in-one-mom. RHS lyk soos Fort Knox met pallisade heinings rondom en sekuriteitshekke by elke liewe gebou. Ons kon nie vasstel of dit is om die kinders binne of die kriminele buite te hou nie. Tot die asblikke word vasgeketting met slot en grendel. Maar smart as ever met parkies en bankies oral - no more sit-op-jou-gat-en-eet-jou-jambroodjie nie. Die T in die T-blok was toe allie tyd vir Tydelik met die t-blok wat nou baksteengeboue is. Die vierkant lyk skielik so groot soos 'n vuurhoutjieboksie en net een graad op 'n slag vergader deesdae daar. Die nuwe vierkant is voor die D-blok waar hulle sement gegooi het oor al die gras wat ons so hard moes plant. Die skoolbankies is snot klein en net 2 A4 papiere sal langs mekaar daarin pas. Ek en Deidre Botma kon sweer ons s'n was nie so klein nie, maar Riaan Eastes en Niels Penzhorn se dit was en ons almal weet Niels Penzhorn is slimmer as 'n mens. Jaco en Annelie se meisiekind Carla is nou daar op skool so sy en haar maats het ons rondgewys.
Die klubhuis was vir ons oopgesluit deur Mnr Danie Greyling (hy's ook nog daar) en die manne en girls het gerugby laat dit bars. Die wat nie lus was vir rugby nie het verder onder die koeltebome gekuier. Die kinders het dit uitgekap op die sprinkasteel en waterwurm en daar was 'n unlimited supply van chips, lolliepops en knibbelstuff.
Teen so sewe-uur het nog mense so stuk-stuk opgedaag vir die reunie funksie. Die term "informele kleredrag" kon netsowel gelees het "dra wat jy wil". Elkeen het letterlik aangetrek waarin hy/sy gemaklik was. 'n Klomp het gebly in hulle tekkies, t-shirts en shorts en ander het mooi kleertjies aangetrek. Ons was seker so 80 volwassenes in totaal en so 30 kinders. Johan BP du Toit was die beste seremoniemeester ever and had us in stiches. 'n Paar ouens het van hulle stoele afgeval van lag. Daar was nametags en elke outjie het sy naam gaan soek tussen die ander name op die 8 tafel-bome en al 196 matrieks se name het iewers aan 'n boom gehang. Of jy daar was of nie - ons het aan jou gedink. Elkeen het gesit waar hy wil. Daar was 'n slide-show met fotos van hoe ons oud-Rusties nou lyk en so 215 foto's van toeka se dae. Die foto's van die reunie word ook daar bygelas en kan by Liezel Smit bestel word. Die hele naweek was besonder gemaak deur die "solo's" wat opgedaag het sonder aanhangsels. Dis lekker om te weet dat ons mekaar gelike of gedislike het voordat ons geword het wie en wat ons vandag is: of die boksie nou "geskei/gesekwestreer/gay/professor/doktor" was - no-one cares. Ons weet tog die boksie is ook maar self dalk net tydelik en nie noodwendig wie die mens is nie.
Die prysuitdeling was 'n hit. Almal het genominate, daar was gestem en die wenner het 'n sertifikaat ontvang. Elke nominee had to strut his/her stuff en walk the walk vir ons.
Hier is die Rustica's:
PRINCE CHARMING: nominees Charl ("Banda") Joubert, Evan Pieterse en Charl Cilliers. Wenner was Banda.
RUSTIE CINDERELLA: nominees Leigh-Ann Stols, Jeurika Wassermann en Salome Hatting. Wenner was Jeurika.
MA-EN-DOGTER LOOK-ALIKE: nominees Annelie (Smit) Cloete en dogter, Elmarie Pelser en dogter, Henriette en dogter. Wenner was Annelie en Carla.
PA-EN-SEUN LOOK-ALIKE: nominees Christo Swart en laaitie, Evan Pieterse en laaitie, Henning Pieterse en laaitie, Paul Smit en laaitie. Wenner is Christo en Joshua Swart.
RUSTIE IN MURG EN BEEN: wie anders: Jaco Cloete. Daar was geen kompetisie - hy's getroud met 'n Rustie, sy dogter is 'n Rustie, hy fight nog met Deborah...
RUSTIE WIE SE TAKKE DIE VERSTE STREK: die nominees Deidre Botma wat van PE af opgevlieg het, Christo Swart van Durban af en Massipa wat van Bazarutho (Mosambiek) af 2 dae lank gery het in sy Cruiser. Flippie het gewen.
RUSTIE GREATEST DRINKER: hier was groot kompetisie en groot sports. BP het 'n proef toets uitgewerk wat alkohol, balans en 'n magdom rondomtalies ingehou het en die manne het alles ingesit. Die nominees Paul Smit, Anton Stegmann, Henning Lubbe en Flip (Massipa) Markram. Die wenner was Anton Stegman.
Elkeen wat daar was (Rustie sowel as plus-one) het 'n glas gekry met die RHS logo, datum en reunie opge"sandblast". Komitee-lede het stunning dankie-se gesenke gekry. Die groot gekuier het aangehou tot lank na middernag en hier tot na 2 uur was ek en my man, Mario Smit en sy vrou, Kobus Stols en sy vrou, Paul en Liezel Smit en Anton Stegmann nog hard aan die kuier. Bitter-einders. Steggies was laaste uit die deur uit.
Sondag-oggend 09:30 het ons bymekaar gekom by die Den, Quintin Jordaan het die mooiste stukkies uit die Bybel gelees en ons het stil geraak ter gedagtenis aan ons maats wat nie meer met ons is nie. Ons was so 20 mense vir die Sondag Sentiment. Ons almal het net weer 'n wake-up-call gekry om te besef dat dit die Here se genade is en NIKS anders wat ons spaar nie. En dat jy jou lewe moet regkry en reghou. Maya Wolmarans se sms boodskap was treffend: "God is good. All the time." Agt oranje rose is neergele, elkeen vir 'n maatjie wat oorlede is. Snot en trane en great memoires - nie een droe oog nie. Die berg wat Annelie en Jaco se tuisgebakte beskuit was het heerlik saam met die koffie afgegaan en na al die snot-en-trane het ons weer begin groot kuier. Ons was soos 'n hoop kole van gisteraand se bon-fire wat begin gloei het met die windjie en toe 'n stomp net naby kom, gaan die vuur groot. Teen 12uur het ek gegroet en gegaan.
Doodmoeg, sielsgelukkig en geseend om hierdie mense in my lewe te he. Van Vrydag-oggend tot Sondag-middag regdeur een groot kuier. Soos Jaco se: Ons is nie vriende nie, ons is familie. Ons hou nie net van mekaar nie, ons is regtig lief vir mekaar. 'n Beter reunie kon daar nooit wees nie.
